സവര്‍ണ്ണേതിഹാസങ്ങള്‍

  സവര്‍ണ്ണമേധാവിത്വ ചിന്ത ഉണര്‍ന്നപ്പോഴാണ് ഇതിഹാസഗ്രന്ഥപാരായണത്തിന്-

  മുതിര്‍ന്നത്.അങ്ങനെ ആര്‍ഷഭാരതത്തിന്റെ ആദി ഇതിഹാസകാവ്യം പൊടിതട്ടി

  പുറത്തെടുത്തു.വായനതുടങ്ങി.വരുണന്റെ പത്താമത്തെപുത്രന്‍ രത്നാകരന്‍ രചിച്ചകൃതി.

  വനാന്തര്‍ഭാഗങ്ങളില്‍ നായാടി നടന്നവന്‍,ഭാര്യാസമേതനായി ഗൃഹസ്ഥാശ്രമം-

  നടത്തുന്നകാലം.സപ്തര്‍ഷികള്‍ നല്കിയ ആത്മജ്ഞാനം.വല്മീകം തുരന്ന്പുറത്തു വന്നവന്‍-

  ‍‍ഋഷിശ്രേഷ്ടന്‍.വായനനീങ്ങുന്തോറും മനസ്സില്‍ ജാതിചിന്ത ഉറഞ്ഞുകൂടി.......

  മാ നിഷാദ...മനസ്സിനെ തിരുത്താന്‍ ആവതും ശ്രമിച്ചു.തികഞ്ഞ പരാജയം.

  വല്മീകം മാഞ്ഞ് കറുത്ത രത്നാകരന്‍ സ്മൃതിയില്‍ നിറയുന്നു.വായന മരിച്ചു.പുസ്തകം മടങ്ങി.

  ഉഷ്ണച്ചൂടില്‍, തിങ്ങിയിരുന്ന പുസ്തകങ്ങളില്‍ നിന്നും മറ്റൊന്ന് വലിച്ചെ‌ടുത്തു.

  വായനാമുറിയില്‍ മത്സ്യഗന്ധം.പരാശരന്റേയും കാളിയുടേയും മകന്‍ കൃഷ്ണനാണത്രേ-

  ഇതിന്റെ കര്‍ത്താവ്.കൃഷ്ണന്റെ അമ്മാത്തിനെ കുറിച്ച് ഓര്‍ത്തുപോയി.ഹീനജാതി.

  വായനതുടരുമ്പോള്‍ വായനാമുറിയില്‍ മത്സ്യഗന്ധം രൂക്ഷം.വീണ്ടും വായന മരിച്ചു.

  പുസ്തകം മടങ്ങി.ഒടുവില്‍ സവര്‍ണ്ണനായ താന്‍തന്നെ രണ്ട് ഇതിഹാസങ്ങള്‍ എഴുതാന്‍-

  തീരുമാനിച്ചു.സവര്‍ണ്ണകുലമഹിമയുള്ള പേരുകള്‍ ചാര്‍ത്തി. സവര്‍ണ്ണരാമായണം....

  സവര്‍ണ്ണഭാരതം...പടയോട്ടങ്ങളുടെ കഥയായതിനാല്‍ എഴുതാനുള്ള മഷിയുടെ-

  നിറവും തിരഞ്ഞെടുത്തു.രക്തവര്‍ണ്ണം....തൂലികയെടുത്ത് രക്തവര്‍ണ്ണ മഷിയില്‍-

  മുനമുക്കി കാത്തിരുന്നു ആത്മജ്ഞാനത്തിനായി... സപ്തര്‍ഷികളുടെ വരവും കാത്ത്.....

                                                                  രൂപേഷ് വെട്ടിക്കവല